2024/25-o‘quv yili uchun OTMlarga qabul 5-25-iyun oralig‘ida: qachon IELTS topshirish kerak?

IELTS topshirmoqchi bo‘lgan abituriyentlarga hujjat topshirishga kech qolmaslik bo‘yicha tavsiyalar

Yangi 2024/2025-o‘quv yili uchun oliy ta’lim muassasalariga hujjat topshirish tartibiga bir qator o‘zgartirishlar kiritildi.

2024/2025 o‘quv yilidan boshlab davlat oliy va professional ta’lim muassasalariga (kasb-hunar maktabi bundan mustasno) qabul qilish bo‘yicha imtihonlar “avval test, so‘ng tanlov” tamoyiliga muvofiq bir vaqtda o‘tkazilishi belgilandi. Bunda:

a) abituriyentlar o‘z tanloviga ko‘ra test sinovi natijasida to‘plagan balidan kelib chiqib, dastlab oliy ta’limning bakalavriat ta’lim yo‘nalishlariga, so‘ng professional ta’lim muassasalariga o‘qishga kirish uchun tanlovda ishtirok etadi;

b) davlat oliy ta’lim muassasalari bakalavriatiga qabul jarayoni quyidagi ikki bosqichda amalga oshiriladi:

birinchi bosqichda abituriyentlar har yili 5-iyundan 25-iyunga qadar (25-iyun kuni ham) test sinovi topshirish uchun ro‘yxatdan o‘tadi hamda test sinovi topshiriladigan fanlar majmuasi, ta’lim tili va test topshirish hududini hamda kirish imtihonlari tarkibida kasbiy (ijodiy) imtihon bo‘lsa, ushbu imtihonni topshiradigan davlat oliy ta’lim muassasasini tanlaydi. Bunda bakalavriat ta’lim yo‘nalishlari bo‘yicha yagona kasbiy (ijodiy) imtihonlar dasturlari va baholash mezonlari tegishli vazirliklar (idoralar) tomonidan Oliy ta’lim, fan va innovatsiyalar vazirligi bilan kelishilgan holda tasdiqlanadi;

o‘qishga qabul qilish bo‘yicha kirish imtihonlari iyul–avgust oylarida o‘tkaziladi;

ikkinchi bosqichda abituriyentlar test sinovlari to‘liq yakunlanganidan so‘ng 15 kun davomida oliy ta’lim muassasasi, bakalavriat ta’lim yo‘nalishi va ta’lim shaklini tanlaydi.

Abituriyentlar qabul tartibiga kiritilgan o‘zgartirishlardan biroz sarosimada, chunki bu holat ularning hujjat topshirishgacha bo‘lgan bir necha rejalarini o‘zgartitib yubordi. Bu xabarda IELTS topshirmoqchi bo‘lgan abituriyentlarga imtihonni qachon topshirish kerakligi, OTMlarga hujjat topshirishga kech qolmaslik yo‘llari haqida ma’lumot beriladi.

Abituriyentlar, siz O‘zbekiston hududida 2 ta test markazi orqali IELTS imtihonlarini topshirishingiz mumkin:

1. O‘zbekistondagi Britaniya Kengashi: https://www.britishcouncil.uz/
2. Edu-Action Imtihonlar markazi: https://www.exams.uz/

Siz IELTS imtihonini 2 turda topshirishingiz mumkin:

• Paper based IELTS (Qog‘ozda IELTS) imtihonini topshirish – bu turdagi imtihon odatda haftaning payshanba va shanba kunlarida bo‘lib o‘tadi, siz test natijalaringizni 13 kundan so‘ng bilib olasiz. Masalan, siz IELTS imtihonini payshanba kuni topshirsangiz, natijasi 2 haftadan keyin chorshanba kuni, agar imtihonni shanba kuni topshirsangiz, test javobi 2 haftadan so‘ng juma kuni chiqadi.

Oliy ta’lim muassasalariga hujjat topshirish 25-iyunda yakunlanishini hisobga olsak, sizga qulay bo‘lgan test sanalarini havola etamiz.

1. 2024-yil 1-iyun – test natijalari 14-iyun, juma kuni e’lon qilinadi
2. 2024-yil 8-iyun – test natijalari 21-iyun, juma kuni e’lon qilinadi.

Ushbu sanalardan birida imtihon topshirsangiz OTMlarga hujjat topshirishga bemalol ulgurasiz, buning uchun yetarli bo‘lgan balni qo‘lga kiritishingiz kifoya.

• CD IELTS (Computer delivered IELTS) yoki IOC (IELTS on Computer) imtihonini topshirish – komputerda IELTS imtihonlari Toshkent shahrida deyarli har kuni o‘tkaziladi, siz test natijalaringizni 3-5 kun ichida bilib olasiz. Masalan, siz imtihonni seshanba kuni topshirsangiz, natijani yakshanba kuniga qadar bilib olasiz. Oliy ta’lim muassasalariga kechikmasdan hujjat topshirish uchun siz 20-iyunga qadar IELTS imtihonidan o‘tishingiz kerak. Quyida 2 ta test markazlarining imtihon kunlarini sizga havola etamiz.

Britaniya Kengashida iyun oyi uchun komputerda IELTS topshirish sanalari, abituriyentlarga natijalar 3-5 kun ichida chiqishini hisobga olib, 20-iyunga qadar (20-iyun kuni ham) test topshirish tavsiya etiladi. ( https://ieltsregistration.britishcouncil.org/ors/book-test )

Edu-Action Imtihonlar markazida iyun oyi uchun komputerda IELTS topshirish sanalari, abituriyentlarga natijalar 3-5 kun ichida chiqishini hisobga olib, 20-iyunga qadar (20-iyun kuni ham) test topshirish tavsiya etiladi. ( https://bxsearch.ielts.idp.com/book-ielts )

Eslatib o‘tamiz, yuqoridagi imtihon kunlari faqatgina Toshkent shahri uchun belgilab o‘tilgan, siz o‘z viloyatingizdagi test kunlarini test markazlari vebsaytlari hamda ijtimoiy tarmoqlari orqali bilib olishingiz mumkin. O‘quvchilarda turli savollar tug‘ilgan taqdirda test markazlari bilan bog‘lanish uchun ularning call-markaz ma’lumotlarini qoldiramiz:

1. Britaniya Kengashi: Tel: +998 71 205 0660 Email: info@britishcouncil.uz
2. Edu-Action imtihon markazi: Tel: +99871 230 01 03 Email: ielts@edu-action.uz

Tahririyatimiz nomidan barcha abituriyentlarga bo‘lajak imtihonlarida omad tilaymiz!