2024-yil birinchi yarmida chet tilini bilish darajasini aniqlash imtihonlari yakunlandi
Chet tilini bilish darajasini aniqlash bo‘yicha may-iyun oylarida o‘tkazilgan milliy sertifikat imtihonlarning gapirish ko‘nikmasini baholash sinovlari 12-iyun kuni yakunlandi. Talabgorlarning natijalari Qurbon hayiti munosabati bilan qo‘shimcha dam olish kunlari belgilanganligi sababli 20-21-iyun kunlari e’lon qilinishi bo‘yicha Agentlikning rasmiy telegram kanalida ma’lumot berilgan .
Agentlik tomonidan natijalar 20-iyun kunning ikkinchi yarmida my.gov.uz saytiga yuklangan. Ammo my.gov.uz saytida yuzaga kelgan texnik uzilishlar sababli talabgorlarning natijalarini yuklash jarayoni 21-iyun kunning ikkinchi yarmida to‘liq yakunlandi.
Shuningdek, bildirilayotgan e’tirozlarda abituriyentlar chet tilidan imtihon natijalari chiqmayotganligi sababli oliy va professional ta’lim muassasalariga kirish test sinovlarida ishtirok etish uchun ro‘yxatdan o‘ta olmayotganligini bildirishgan.
Ma’lumki Agentlik tomonidan taqdim etiladigan sertifikatlarning ma’lumotlari abituriyentlarning shaxsiy kabinetida to‘g‘ridan to‘g‘ri aks etadi. Shu boisdan abituriyentlarning ro‘yxatdan o‘tishi chet tili imtihonlarining natijalari bilan bog‘liq emas .
