Kilian Mbappe Parijda bo‘lib o‘tadigan Olimpiyada o‘yinlarida qatnashadimi?
Fransiya prezidenti Emmanuel Makron “Real Madrid” klubi prezidenti Florentino Peresdan bu haqda izoh so‘radi.
L’Equipe bergan xabarga ko‘ra, 2024-yilning 21-may kuni FIFAning 120 yilligiga bag‘ishlangan yig‘ilishda Fransiya davlatining prezidenti Emmanuel Makron Florentino Peresni Kilian Mbappeni Parijdagi Olimpiyada o‘yinlariga qo‘yib yuborishga ko‘ndirishga urindi. Biroq “Real Madrid” prezidenti taklifni rad etib Kilian Mbappe uning jamoasi futbolchisi emasligini aytdi.
Eslatib o‘tamiz, hozirda “PSJ” klubining tarkibida bo‘lib turgan 25 yoshli hujumchi 2024-yilning 1-iyul sanasidan boshlab erkin agentga aylanadi. Ko‘pgina taniqli xorijiy agentlar fikriga ko‘ra, Kilian allaqachon Madridning Real klubi bilan shartnoma shartlarini kelishib olgan. Transfer borasidagi rasmiy xabar “Real Madrid” hamda “Borussiya Dortmund” klublari o‘rtasidagi Yevropa Chempionlar Ligasi final o‘yinidan so‘ng e’lon qilinishi kutilmoqda.
