Transfer qiymati eng yuqori bo‘lgan top-10 o‘zbek futbolchilari
Eldor Shomurodov yoki Abbosbek Fayzullayev: O‘zbekistonda eng “qimmat” futbolchi kim?
Futbolchilarning terma jamoa hamda futbol klublaridagi faoliyati, gollar hamda assistlar soni, erishgan jamoaviy hamda individual sovrinlari, shuningdek, yillar davomida transfer qiymatining o‘zgarib borish statistikasi transfermarkt.com sayti tomonidan yuritib kelinadi. Keling, bugun sizlar bilan transfer narxi eng yuqori bo‘lgan top-10 o‘zbekistonlik futbolchilar bilan tanishamiz.
- Eldor Shomurodov, Kalyari (Italiya A seriyasi), markaziy hujumchi, 28 yosh
Eldor Shomurodov 1995-yil 29-iyunda Surxondaryo viloyatida tug‘ilgan. Professional faoliyati davomida Mash’al, Bunyodkor, Rostov (Rossiya), Italiyaning Jenoa, Roma, Spetsiya hamda Kalyari jamoalarida to‘p surgan. Hozirgi transfer qiymati – 5 mln yevro, 2021-yil oktabr oyida faoliyatidagi eng yuqori transfer qiymati qayd etilgan – 14 mln yevro. Bu mavsum Kalyari safida jami 24 o‘yinda maydonga tushib, 3 gol va 3 assistni o‘z hisobiga yozdirib qo‘ygan. Terma jamoadagi faoliyati davomida 71 o‘yinda 40 gol va 10 assist muallifi bo‘lgan.
2. Abbosbek Fayzullayev, SSKA Moskva (Rossiya), hujumkor yarimhimoyachi, 20 yosh
Abbosbek Fayzullayev 2003-yilning 3-oktabr kuni Sirdaryo viloyatida tug‘ilgan. Professional faoliyati davomida Paxtakor hamda SSKA Moskva jamoalarida o‘ynagan. Hozirgi va faoliyatidagi eng yuqori transfer narxi – 5 mln yevro. Bu mavsum SSKA safida 32 o‘yinda maydonga tushib, 5 gol va 14 assistni o‘z hisobiga yozdirib qo‘ygan. Terma jamoadagi debyuti 2023-yil 11-iyunda Ummonga qarshi bo‘lib o‘tgan, shundan beri 15 o‘yinda 4 gol va 1 assist muallifi bo‘lgan.
3. Aziz G‘aniyev, Shabab al-Ahli (Birlashgan Arab Amirliklari), markaziy yarimhimoyachi, 26 yosh
Aziz G‘aniyev 1998-yilning 22-fevral kuni Jizzax viloyatida tug‘ilgan. Professional faoliyati davomida Nasaf hamda Shabab al-Ahli jamoalarida o‘ynagan. Hozirgi va faoliyatidagi eng yuqori transfer narxi – 3.50 mln yevro. Bu mavsum Shabab al-Ahli safida 23 o‘yinda maydonga tushib, 3 gol va 5 assistni o‘z hisobiga yozdirib qo‘ygan. Terma jamoa safida hozirgi qadar 15 o‘yin o‘tkazgan.
4. Otabek Shukurov, Kayserispor (Turkiya), markaziy himoyachi, 27 yosh
Otabek Shukurov 1996-yilning 22-iyun kuni Qashqadaryo viloyatida tug‘ilgan. Professional faoliyati davomida Mash’al, Bunyodkor, Sharja (Birlashgan Arab Amirliklari) hamda Turkiyaning Karagumruk va Kayserispor jamoalarida o‘ynagan. Hozirgi transfer qiymati – 2.50 mln yevro, faoliyatidagi eng yuqori transfer narxi 2022-yil 18-mayda qayd etilgan – 4 mln yevro. Bu mavsum Kayserispor safida 27 o‘yinda maydonga tushib, 1 assistni o‘z hisobiga yozdirib qo‘ygan. Terma jamoa safida 27 o‘yinda 1 assist muallifi bo‘lgan.
5. Abduqodir Xusanov, Lans (Fransiya), markaziy himoyachi, 20 yosh
Abduqodir Xusanov 2004-yilning 29-fevral kuni Toshkent shahrida tug‘ilgan. Professional faoliyati davomida Bunyodkor, Belarussiyaning Energetik-BGU hamda Fransiyaning Lans jamoalarida o‘ynagan. Hozirgi transfer qiymati – 2 mln yevro. Bu mavsum Lans safida 16 o‘yinda maydonga tushgan. Terma jamoa safida hozirga qadar 12 o‘yinda maydonga tushgan, rasmiy debyuti 2023-yilning 11-iyunida Ummon terma jamoasiga qarshi bo‘lib o‘tgan.
6. Jaloliddin Masharipov, Istiqlol (Eron), chap qanot vingeri, 30 yosh
Jaloliddin Masharipov 1993-yilning 1-sentabr kuni Xorazm viloyatida tug‘ilgan. Professional faoliyati davomida Toshkentning Paxtakor va Lokomotiv, Saudiya Arabistonining Al-Nassr, Birlashgan Arab Amirliklarining Shabab al-Ahli, Gretsiyaning Panserraykos hamda Eron Islom Respublikasining Istiqlol jamoalarida o‘ynagan. Hozirgi transfer qiymati – 1.50 mln yevro, faoliyatidagi eng yuqori transfer narxi 2022-yil 6-yanvarda Al-Nassr safida qayd etilgan – 3 mln yevro. Joriy mavsum Istiqlol safida 22 o‘yinda maydonga tushib, 2 gol va 3 assistni o‘z hisobiga yozdirib qo‘ygan. Terma jamoa safida 63 o‘yinda 12 gol va 10 assist muallifi bo‘lgan.
7. Igor Sergeyev, Patum Yunayted (Tayland), markaziy hujumchi, 31 yosh
Igor Sergeyev 1993-yilning 30-aprel kuni Toshkent shahrida tug‘ilgan. Professional faoliyati davomida Paxtakor, Xitoyning Guoan, Birlashgan Arab Amirliklarining Al-Dafra, Qozog‘istonning Aqtobe va Tobol Kastanay, Taylandning Patum Yunayted jamoalarida o‘ynagan. Hozirgi transfer qiymati – 1.20 mln yevro, faoliyatidagi eng yuqori transfer narxi 2016-yil 6-iyulda qayd etilgan – 2 mln yevro. Bu mavsum Patum Yunayted safida 24 o‘yinda maydonga tushib, 11 golni o‘z hisobiga yozdirib qo‘ygan. Terma jamoa safida 73 o‘yinda 20 gol va 3 assist muallifi bo‘lgan.
8. Odiljon Xambrobekov, Navbahor, tayanch yarimhimoyachi, 28 yosh
Odiljon Xamrobekov 1996-yilning 13-fevral kuni Namangan viloyatida tug‘ilgan. Professional faoliyati davomida Nasaf, Paxtakor, Navbahor hamda Birlashgan Arab Amirliklarining Shabab al-Ahli jamoalarida o‘ynagan. Hozirgi va faoliyatidagi eng yuqori transfer narxi 2023-yil 4-dekabrda qayd etilgan – 1.20 mln yevro. Bu mavsum Navbahor safida 17 o‘yinda maydonga tushib, 1 gol va 2 assistni o‘z hisobiga yozdirib qo‘ygan. Terma jamoa safida 53 o‘yinda 1 gol va 5 assist muallifi bo‘lgan.
9. Xusniddin Aliqulov, Caykur Rizespor (Turkiya), markaziy himoyachi, 25 yosh
Xusniddin Aliqulov 1999-yilning 4-aprel kuni Qashqadaryo viloyatida tug‘ilgan. Professional faoliyati davomida Mash’al, Nasaf hamda Turkiyaning Rizespor jamoalarida o‘ynagan. Hozirgi va hozircha faoliyatidagi eng yuqori transfer narxi 2023-yil 27-sentabrda qayd etilgan – 1.20 mln yevro. Bu mavsum Rizespor safida 22 o‘yinda maydonga tushgan. Terma jamoa safida 20 o‘yinda 1 gol muallifi bo‘lgan.
10. Oston O‘runov, Persepolis (Eron), chap qanot vingeri, 23 yosh
Oston O‘runov 2000-yilning 19-dekabr kuni Navoiy viloyatida tug‘ilgan. Professional faoliyati davomida O‘zbekistonning Paxtakor, Navbahor, Lokomotiv, Rossiyaning Ufa, Spartak Moskva, Ural hamda Eron Islom Respublikasining Persepolis jamoalarida o‘ynagan. Hozirgi transfer qiymati – 1 mln yevro, faoliyatidagi eng yuqori transfer narxi 2020-yil 29-iyulida qayd etilgan – 1.50 mln yevro. Bu mavsum Persepolis safida 19 o‘yinda maydonga tushib, 10 gol va 3 assistni o‘z hisobiga yozdirib qo‘ygan. Terma jamoa safida 27 o‘yinda 6 gol va 1 assist muallifi bo‘lgan.
