Abbosbek Fayzullayev Ispaniya “LaLiga”sida o‘ynashi mumkin
Rossiyaning SSKA futbol klubi va O‘zbekiston milliy terma jamoasi yarimhimoyachisi Abbosbek Fayzullayev Ispaniyaning “Vilyarreal” klubida faoliyatini davom ettirishi mumkin. Ba’zi sport insayderlarining xabarlariga ko‘ra, LaLiga klubi vakillari ayni vaqtda Abbosbek Fayzullayevni Ispaniyaga olib kelish bo‘yicha muzokaralarni boshlagan.
Biroz muddat ilgari Abbosbek Fayzullayevga kuchli beshlik chempionati jamoalaridan (jumladan, Italiyaning “Parma” klubidan) qiziqish bo‘lishiga qaramasdan, uning SSKA klubida yana bir mavsum qolishi haqida gap-so‘zlar tarqalgandi. Abbosbek Fayzullayev ham intervyularidan birida uning 2025-yilgacha SSKA klubi bilan shartnomasi borligini, hozircha ushbu klub bilan baxtli ekanini aytib o‘tgan edi.
Xabarlarga ko‘ra, Abbosbek Fayzullayevning “Vilyarreal”ga o‘tishi masalasi shu oy yakuniga qadar hal bo‘lishi kerak. Eslatib o‘tamiz, Transfermarkt portali Fayzullayevning transfer narxini 5 mln yevrodan 6 mln yevroga yangiladi, hozirda Abbosbek O‘zbekistonning eng “qimmat” futbolchisi hisoblanadi.
