Birinchi liga. “FarDU” oʻz oʻyinini oʻtkazdi
Futbol boʻyicha birinchi liganing Sharq mintaqasida ishtirok etayotgan Fargʻona davlat universitetining “FarDU” klubi bugun musobaqaning 6-turi doirasida oʻz uyida “Toshkent viloyati futbol akademiyasi” klubini qabul qildi.
Soat 17:00 da start olgan uchrashuvda mehmonlar darvozasi 5 bor ishgʻol qilindi. Ilk gol 7-daqiqada mezbonlar futbolchisi Otabek Zokirov tomonidan kiritildi. 1-boʻlim yakuniga oz qolgan bir pallada “FarDU”ning boshqa bir futbolchisi Rizo Ayvazov ham oʻz nomini tabloga yozdirib qoʻygan holda hisobni 2:0 boʻlishini ta’minladi. Ikkinchi bo’limning 48-daqiqasida yuzaga kelgan imkoniyatdan unumli foydalangan Otabek Zokirov hisobni yirik 3:0 koʻrinishiga keltirdi.
Oradan koʻp oʻtmay, aniqrogʻi bellashuvning 51-daqiqasida toʻqnashuvning navbatdagi goli urildi. 4:0. Gol muallifi Rizo Ayvazov. Bahsdagi toʻxtalishlar oʻrnini qoplash maqsadida bosh hakam tomonidan qoʻshib berilgan daqiqada Otabek Zokirov tomonidan kiritilgan gol oʻyinga nuqta qoʻydi, 5:0. Shu tariqa Sergey Lebedov boshqaruvidagi universitet klubi oʻz hisobiga 3 ochkoni yozdirib qoʻydi.
